|
Sonntag, 27. September 2009 |
|
20.09.09
Wie die Zyt rennt….
Jetzt bin ich, d Nina, scho flissig am umme Krabble, und ha au scho e rächts Tempo druff ;-)
Nur macht mir das jetzt scho nüm eso spass, i bi jetzt scho flissig am Ufstoh und probier au scho elai z stoh, was ich ab und zue für es paar Sekunde au schaff…!
Amme nimm i au dr Lenja ihres Kindersofa und lauf drmit umme, das macht den spass.
Was au gaaaaaaaaaaaaaaanz toll isch, d` Spielzügkiste Usruume und alles im ganze Wohnzimmer z verteile, s Mami het do amme nit eso freud, aber si loht d Lenja und mi gewähre.
Mir dien den au alles wieder zämme Ufruume, i gib mir jo mieh do scho mit z`hälfe, aber es funktioniert noni so ganz, i beschäftige mi den mit em Klötzli ins Muul näh und em Mami und dr Lenja zue zluege.
Was amme nit eso schön isch, d Lenja isch viel schnäller als ich und den verwütsch i das wo i will nit immer, und den kah i scho rächt täubele, aber das vergoht den au wieder, meistens bringt mi d Lenja den wieder zum Lache, oder si git mir den s Spielzüg ainewäg, si isch ebbe scho e tolli grossi Schwester.
Was gits sunsch no neus?
Ah, i bikumm jetzt z Oobe immer esone feine Schoppe, wo anschiinend meh sott sättige, aber das Funktioniert bi mir anschiinend nit eso guet, i will z Nacht ainewäg no oft dr Schoppe, was s Mami amme zu sehr wenig schloff lot loh koh, aber si nimmts mir nit eso krumm, hihi
Zum Glück hets Mami das ganze Agfange wo si eh nit eso het könne pfuuse, will si am Mäntig alli 4 Wiisheitszähn het loh use näh, alli 4 ufs mol, so ne chasper.
Si het au dämentsprächend usgseh, grins, dr Papi het ihre immer Hammster gseit, i weiss zwar noni was das isch, aber das wird sicher stimme.
Uff allfäll het si glaub immer no weh, den wenn d Lenja oder ich drah *kömme*, duet si immer no zämme zugge, i hoff das goht gly wieder umme.
Ansunschte probier i jede Daag neus us, i due au amme dr Kopfstand mache ,also e verkehrti Brugg, den isch d Wält chaibe glatt, so alles verdrait a zluege. Ich könnt mi den amme kaputt lache…
|
|
|
Sonntag, 20. September 2009 |
|
E grosse Daag für d Nina 26.08.09
Probiere duen is jo scho es paar Dääg, und Hüt voilà, i kum vorwärts.
Juhui, mini Krabbel versiech zeige Erfolg, i kah mi vorwärts bewege, ok, es isch no sehr langsam und e weneli wackelig, aber i kum VORWÄRTS!!!!!!
Nach e paar *Schritt* wird i aber Fuchsteufelswiil, will i mir vorkum wie e Schnägg L
Aber s Mami redet mir guet zue und au d Lenja unterstützt mi uf ihri Art, i wird sicher jede Daag witter iebe und irgendwenn bin i so schnäll wie ne Blitz ;-)
|
|
|
Freitag, 31. Juli 2009 |
|
Juhuiiiiiiiiiiiiiiiiiii, hüt han i Geburtstag
I bi stolzi 3 Joor alt worde.
Scho am Morge frie häns Mami, dr Papi, und s Grossmami für mi Gsunge, so toll.
Mir hän is den aagleggt und sin zum Omi und em Opi ind Baiz gange, dört han i es Ditti vomene Gast bikoh, so toll.
Au sunscht isch es mir guet gange.
Wo mir zum Grossmami Hai sin ischs losgange, mit Kueche backe, Dekoriere, de erste Gschänkli uspacke und und und, es isch wunderbbar gseh.
Uf die 5i sin den Gäst koh, mi Urgrossmami, und dr Urgrosspapi, mit em Chino, oder heisst dr Hund Nöggeli? Do bin i mir nit ganz sicher, aber das isch jo au egal.
Dr Götti Benny, d Kathrin und d Giulia,sin au koh, wie au mi Dante d Dutzi, dr Pete und mi Cousin dr Dave,dr Peti isch mit em Till und em Luis koh, d Diana sini Fründin isch spöter no koh.
Au s Gotti Isi und dr Martin sin koh, e riise Fescht also und das alles füt mi J
SI hän gsunge und i ha dörfe Gschänkli uspacke, e Zug, Gleis, es Auto, Stofftierli, Spänggeli, Puzzle, e Kesseli wo i kah Sunneblueme sälber pflanze, und e Käppli und es Kleidli han i bikoh, es isch sooooooooooo toll gseh.
Mir hän zämme gspielt und Kueche gässe, dä isch so fein gseh.
I bi no chaibe lang wach gseh, obwohl die meiste scho gange sin, i ha mit em Gotti no mis neue Puzzle es paar mol gmacht, und mit em Martin han i Guggus gspielt.
Alles in allem find ich, meh sott meh als 1 mol im Joor Geburtstag ha J
|
|
|
|
<< Anfang < Vorherige 1 2 3 4 5 6 Nächste > Ende >>
|
| Ergebnisse 1 - 4 von 21 |
Admin